October 20, 2020

News PK

Latest Updates

سندھ کے سوا باقی صوبوں میں مڈل اسکول کھل گئے

 

چھٹی سے آٹھویں جماعت تک بچوں کی تعلیمی سرگرمیاں بحال

چھٹی سے آٹھویں جماعت تک بچوں کی تعلیمی سرگرمیاں بحال

 اسلام آباد: اسلام آباد سمیت ملک کے بیشتر حصوں میں مڈل اسکول کھل گئے اور تقریبا 7 ماہ بعد تدریسی عمل بحال ہوگیا تاہم سندھ میں اسکول بدستور بند ہیں۔

ملک میں دوسرے مرحلے کے تحت چھٹی سے آٹھویں جماعت تک بچوں کی تعلیمی سرگرمیاں بحال ہوگئیں۔ اس حوالے سے اسکول انتظامیہ اور محکمہ تعلیم نے ایس او پیز کے تحت انتظامات مکمل کئے ہیں۔

بچوں کے لئے ماسک پہننا اور کلاس میں سماجی فاصلہ لازمی قرار دیا گیا ہے۔ گنجائش کے حساب سے ایک کلاس میں 30 سے زائد بچوں کے بیٹھنے کی اجازت نہیں۔ زیادہ طلبہ والی کلاسز میں بچوں کو دو گروپس میں تقسیم کرکے متبادل دنوں میں بلایا جا رہا ہے۔

اساتذہ روزانہ کی بنیاد پر بچوں کو کلاس میں کورونا سے بچاؤ کے حوالے سے آگاہ کریں گے۔ بچوں کو اسکولوں میں ایک دوسرے سے ہاتھ ملانے سے منع کیا گیا ہے اور بار بار ہاتھ دھونے کی ہدایت کی گئی ہے۔ محکمہ تعلیم کی مختلف ٹیمیں اسکولوں میں جا کر ایس او پیز پر عمل درآمد کا جائزہ لے رہی ہیں۔

یہ بھی پڑھیں: سندھ میں سیکنڈری کلاسز کھولنے کا فیصلہ موخر

تعلیمی سرگرمیوں میں طویل تعطل کے باعث صوبائی حکومتوں نے اسمارٹ اکیڈمک کلینڈر بھی متعارف کروایا ہے جس کے تحت بچوں کے نصاب میں کمی کی گئی ہے۔

اسکول کھلنے سے علی الصباح یونی فارم پہنے بچوں کی تعداد میں مزید اضافہ ہو گیا ہے اور اسکول لیجانے والی گاڑیوں کی تعداد بھی بڑھ گئی ہے۔ اسکولوں میں ہجوم سے بچنے کے لیے بچوں کو فاصلے سے رکھا گیا ہے۔ کورونا کی وبا کے باعث حکومت نے لاک ڈاؤن کرتے ہوئے مارچ میں ملک بھر میں تعلیمی ادارے بند کردیے تھے۔